भैरहवा । नेपाल रेडक्रस सोसाइटी बेलहिया उप–शाखाले रेडक्रस सोसाइटीको ६३ औं स्थापना दिवसको अवसर पारेर युवा रेडक्रस सर्कल कृषि तथा पशु विज्ञान अध्ययन संस्थान, पक्लिहवा क्याम्पसलाई पाँच थान प्राथमिक उपचार (फस्ट एड) बक्स हस्तान्तरण गरेको छ ।
बेलहिया उप–शाखा अन्तर्गत रहेको युवा रेडक्रस सर्कललाई उक्त सामग्री वितरण गरिएको हो। यस पहलले विद्यार्थीहरू र क्याम्पस समुदायका लागि आपत्कालीन अवस्थामा तत्काल प्राथमिक उपचारको उपलब्धता सुनिश्चित गर्नेछ । रेडक्रस बेलहिया उप–शाखाका सभापति राकेश गुरुङको अध्यक्षतामा आयोजित कार्यक्रममा रेडक्रस रुपन्देही जिल्ला शाखाका उपसभापति सुशील गुरुङ प्रमुख अतिथि हुनुहुन्थ्यो।
कार्यक्रममा युवा रेडक्रस सर्कल पक्लिहवा क्याम्पसका सभापति सुचना थापा, रेडक्रस बेलहियाका निवर्तमान सभापति सुमन शर्मा, सिद्धार्थनगर नगरपालिका–१ का निवर्तमान वडाअध्यक्ष रमेश मल्ल, नयाँगाउँ रानीगाउँ मन्दिर व्यवस्थापन समितिका सचिव नन्द राना, रेडक्रस बेलहियाका संस्थापक कोषाध्यक्ष मन्जु रेग्मी, रेडक्रस सिद्धार्थनगरका सभापति राजेश जि.सी. लगायतका विशिष्ट व्यक्तिहरूको उपस्थिति रहेको थियो । यस सहयोगले रेडक्रसको मानवीय सेवाको भावनालाई अगाडि बढाउँदै समुदायमा स्वास्थ्य र सुरक्षाको महत्त्वबारे जनचेतना जगाउन मद्दत पुग्ने विश्वास गरिएको छ।
