काठमाडौं । नेपाल खेलकुद महासंघ र एसएस इभेन्ट्स प्रालिले संयुक्त रुपमा आयोजना गर्ने ‘नेकोस कर्पोरेट सुपर सिक्सेस क्रिकेट प्रतियोगिता’ को सातौं संस्करण
वैशाख २३ देखि २८ गतेसम्म काठमाडौंमा सञ्चालन हुने भएको छ । नेपाल खेलकुद महाहसंघ र एसएस इभेन्ट्सबिच बिहीबार उक्त प्रतियोगिता सञ्चालन गर्ने सम्बन्धमा सम्झौता भएको थियो ।
सम्झौता पत्रमा नेपाल खेलकुद महासंघको तर्फबाट विप्लव घोष र एसएस इभेन्ट्स म्यानेजमेन्ट कम्पनीको तर्फबाट सुमित रौनियारले हस्ताक्षर गरे । प्रतियोगिताबारे आयोजकले शुक्रबार पत्रकार सम्मेलनमार्फत कर्पोरेट क्षेत्रमा कार्यरत कर्मचारीहरुको खेलकुद प्रतिको रुचिलाई ध्यानमा राखी प्रतियोगिता आयोजना गर्न लागेको जानकारी गराएका छन् ।
स्वास्थ्य जोगाउन खेलकुदको महत्वलाई जोड दिनुपर्ने बताएका विप्लव घोषले पूर्वमा झापादेखि पश्चिममा महाकालीसम्म पहुँच सुनिश्चित गर्दै खेलकुदलाई राष्ट्रव्यापी रूपमा प्रवर्द्धन गर्न नेकोसको तर्फबाट प्रतिबद्धता व्यक्त गरे । प्रतियोगितामा नेपाल क्रिकेट संघ (क्यान) ले प्राविधिक सहयोग गर्नेछ ।
सो प्रतियोगितामा २४ वटा कर्पोरेट हाउसको सहभागिता रहने आयोजकले जनाएको छ । प्रतियोगिता सेतो बलले खेलाइने छ भने सहभागी खेलाडीहरुले रंगिन जर्सी लगाउन सक्नेछन् ।
प्रत्येक खेलमा दुबै टोलीले पाँच–पाँच ओभर ब्याटिङ गर्नेछन् । प्रतियोगिताका सहभागीलाई आयोजकले नै खेल पोशाक उपलब्ध गराउने बताइएको छ । आयोजकले प्रतियोगिताको अनुमानित बजेट ४० लाख रुपैयाँ रहेको जनाएको छ ।
प्रतियोगिताको विजेता, उपविजेता, म्यान अफ दी सिरिज, उत्कृष्ट ब्याट्सम्यान, उत्कृष्ट बलर र उत्कृष्ट फिल्डरलाई पुरस्कार स्वरुप ट्रफी र आकर्षक उपहार प्रदान गरिने आयोजकले जनाएको छ ।
