भैरहवा । रुपन्देहीको सिद्धार्थनगर नगरपालिका–२ मेउडिहवाबाट सशस्त्र प्रहरीले नक्कली नेपाली नोटसहित तीन जनालाई पक्राउ गरेको छ। सशस्त्र प्रहरी बल नेपाल नं. २७ गण हेडक्वार्टर रुपन्देहीबाट खटिएको टोलीले भारतबाट नेपालतर्फ पैदल तथा मोटरसाइकलमा आउँदै गरेका व्यक्तिहरूलाई शङ्कास्पद अवस्थामा चेकजाँच गर्ने क्रममा नियन्त्रणमा लिएको हो। पक्राउ पर्नेहरूमा रुपन्देहीको सियारी गाउँपालिका–२ सेमराका २३ वर्षीय अरुण गुप्ता, मायादेवी गाउँपालिका–७ बनगाईका २० वर्षीय रामदिन यादव र सोही ठाउँका २० वर्षीय धीरज राजभर रहेका छन् ।
निजहरूको साथबाट एउटै नम्बर ‘झ ७९ १६९०३३’ रहेका रु एक हजार दरका १२ थान नक्कली नेपाली नोट रु १२ हजार र सक्कली नेपाली रु ८० बरामद गरिएको छ । साथै, उनीहरूले प्रयोग गरेको लु ८७ प ६७७५ नम्बरको यामाहा मोटरसाइकल र तीन थान मोबाइल सेटसमेत जफत गरिएको छ। बरामद गरिएका सामान, मोटरसाइकल तथा पक्राउ परेका तीनै जनालाई आवश्यक कानुनी कारबाहीका लागि जिल्ला प्रहरी कार्यालय रुपन्देहीमा बुझाइएको सशस्त्र प्रहरीले जनाएको छ।
