बुटवल । जिल्ला प्रहरी कार्यालय रुपन्देहीले पछिल्लो तीन दिनमा विशेष अपरेसन चलाएर करिब ६६ लाख ४३ हजार रुपैयाँ बराबरको अवैध सामान बरामद गरेको छ । भन्सार छली र चोरी पैठारी गरी ल्याइएका यी सामानहरू जिल्लाका विभिन्न स्थानबाट नियन्त्रणमा लिइएको हो।
प्रहरीका अनुसार, सबैभन्दा ठूलो बरामदगी बुटवलको रामनगरमा भएको छ, जहाँ एक कन्टेनरबाट ५४ लाख ३० हजार मूल्यका ब्रान्डेड जुत्ता र कपडा बरामद गरिएको हो । उक्त घटनामा संलग्न चालक र सह-चालकलाई नियन्त्रणमा लिइएको छ ।
यसैगरी, बेलहिया, अञ्चलपुर, कोटहीमाई, र मंगलापुर जस्ता स्थानबाट पनि लत्ताकपडा, इलेक्ट्रोनिक्स, पटाका, कीटनाशक औषधि र किरानाका सामानहरू ठूलो परिमाणमा जफत गरिएको छ ।
जिल्ला प्रहरी प्रमुख एसपी प्रदिप बहादुर क्षेत्रीले बरामद गरिएका सम्पूर्ण सामान आवश्यक कारबाहीका लागि भन्सार र राजस्व अनुसन्धान कार्यालयमा बुझाइएको बताउनुभयो । उहाँले अवैध गतिविधि माथि प्रहरीले निगरानी बढाएको र संलग्नलाई कुनै हालतमा नछोड्ने प्रतिबद्धता व्यक्त गर्नुभयो।
