स्रोत नखुलेको आठ लाखभन्दा बढी रकमसहित एक जना पक्राउ

सिरहा । सिरहामा स्रोत नखुलेको ८ लाख २५ हजार नगदसहित एक जना पक्राउ परेका छन्। पक्राउ पर्नेमा कल्याणपुर नगरपालिका–१, बनिनियाँ निवासी करिब ३० वर्षीय राशिन्द्र मण्डल छन् । जिल्ला प्रहरी कार्यालय सिरहाका अनुसार, मण्डललाई भारतबाट नेपालतर्फ आउँदै गर्दा सिराहा नगरपालिका–२०, लगडिगदियानीस्थित प्रहरीचौकीबाट खटिएको गस्ती टोलीले पक्राउ गरेको हो ।

प्रहरी नायब उपरीक्षक रमेशबहादुर पालका अनुसार, मण्डलको साथबाट ८ लाख २५ हजार नगद, दुई थान कपाली तमसुक, आरुष रेमिट्यान्सको एक थान स्ट्याम्प, विभिन्न बैंकका पाँच थान एटिएम कार्ड र चेकबुक बरामद गरिएको छ। उनी म प्र ०२–०१–००३ प २१०२ नम्बरको मोटरसाइकलमा आएका थिए। शंका लागेर जाँच गर्दा यो रकम र कागजात फेला परेको र घटनाबारे थप अनुसन्धान भइरहेको प्रहरीले जनाएको छ।