भैरहवा । रुपन्देहीको रोहिणी गाउँपालिकाको सदरमुकाम मानिने रोहिणी वडा नम्बर ३ स्थित धकधई बजारमा सार्वजनिक शौचालय नहुँदा सर्वसाधारणले सास्ती खेप्नुपरेको छ। दैनिक सयौं मानिसको आवतजावत हुने मुख्य बजारमा शौचालय जस्तो अत्यावश्यक सुविधा नहुँदा यात्रु तथा स्थानीय खुला स्थानमा शौच गर्न बाध्य भएका छन्।
बजारमा किनमेल तथा यात्राको क्रममा पुगेकाहरुले शौचालय नहुँदा ठूलो समस्या भोग्नुपरेको गुनासो गरेका छन्। बसबाट झरेका एक यात्री सुभाष चौधरीले गाउँपालिकाको मुकाममै शौचालय नहुनु लाजमर्दो भएको बताए। "स्थानीय सरकारले तत्काल सार्वजनिक शौचालय बनाउनुपर्छ," उनले भने, "हामी त कहीँ गएर दिशापिसाब गरौंला, तर महिला दिदीबहिनीहरु कहाँ जाने? यो गम्भीर समस्या हो, यसप्रति तत्काल ध्यान दिन अनुरोध गर्दछु।" यस्तै, नवलपरासीबाट धकधई बजार आएकी चन्द्रवाती हरिजनले पनि यति मुख्य बजारमा शौचालय छैन भन्दा अचम्म लागेको प्रतिक्रिया दिइन्।
सार्वजनिक शौचालय जस्तो न्यूनतम पूर्वाधार निर्माणमा समेत गाउँपालिकाले बेवास्ता गरेको स्थानीयहरुको आरोप छ। उनीहरुका अनुसार यसले रोहिणी गाउँपालिका बजार व्यवस्थापनप्रति गैरजिम्मेवार देखिएको प्रस्ट हुन्छ। बजार क्षेत्रमा शौचालय नहुँदा दुर्गन्ध फैलने र स्वच्छतामा समेत असर पर्ने भन्दै स्थानीयले सम्बन्धित निकायको ध्यानाकर्षण गराएका छन्।
