जनकपुर । मधेश प्रदेशका मुख्यमन्त्री सतिशकुमार सिंहले वीरगन्जस्थित मानवसेवा आश्रमको अवलोकन गर्दै संस्थाले असहाय, अशक्त र बेवारिसे नागरिकको सेवा मार्फत समाजमा मानवीयता र समर्पणको अनुपम उदाहरण प्रस्तुत गरेको बताएका छन् ।
शनिबार जनमत पार्टीका पर्सा जिल्ला अध्यक्ष ओमप्रकाश सर्राफ, नेतृ रम्भा मिश्रा, मधेश विश्वविद्यालयका उपकुलपति डा. दीपक शाक्य, वीरगन्ज उद्योग वाणिज्य संघका अध्यक्ष हरि गौतमसहितको टोलीसहित आश्रम पुगेका मुख्यमन्त्री सिंहले सेवा भावना, व्यवस्थापन र समर्पित टोलीको कार्यप्रति गहिरो सम्मान व्यक्त गरे ।
अवलोकनपछि उनले प्रदेश सरकार सामाजिक सेवामा संलग्न यस्ता संस्थाहरूसँग सहकार्य गर्दै मानव कल्याणका कार्यक्रमहरूलाई थप प्रभावकारी बनाउँदै लैजाने प्रतिबद्धता पनि व्यक्त गरे ।
मानवसेवा आश्रमले सडकमा बेवारिसे, मानसिक असन्तुलनयुक्त र विपन्न अवस्थाका व्यक्तिहरूलाई उद्धार गरी आश्रय, उपचार तथा पुनःस्थापनाको व्यवस्था गर्दै आएको छ। मुख्यमन्त्रीको भ्रमणले संस्थाको सेवा कार्यप्रति प्रदेश सरकारको ध्यानाकर्षण भएको आश्रम प्रशासनको भनाइ छ ।
