रामेछाप । रामेछापको एक मात्र हिमाली गाउँपालिका उमाकुण्ड गाउँपालिकाले नागरिकलाई गाउँबाटै सरकारी सेवा प्रवाह गर्न एकीकृत घुम्ती शिविर सञ्चालन गरेको छ । रामेछाप जिल्लको अन्तिम मानववस्ती हिमाली गाउँ वडा नं–१ गुम्देलबाट शिविर सुरु भएको हो । शिविरको शुभारम्भ गाउँपालिका अध्यक्ष शेरबहादुर सुनुवारले गरे ।
गुम्देलमा सञ्चालन गरिएको शिविरमा ५३ जनाले नेपाली नागरिकताको प्रमाणपत्र प्राप्त गरेका छन् । त्यस्तै ५१ जनाको राष्ट्रिय परिचयपत्रका लागि विवरण सङ्कलन गराएको छ भने ५ जनालाई राष्ट्रिय परिचयपत्र वितरण गरिएको छ। शिविरमा गाउँपालिका मार्फत वडामा सञ्चालन हुने १० वटा योजना सम्झौता भएको छ । त्यसैगरी ५ व्यवसायीले व्यवसाय नवीकरण गराएका छन्।
पशु स्वास्थ्य अन्तर्गत ६८ घरधुरीका ८ सय ४ पशुलाई औषधि वितरण गरिएको छ। साथै ९ वटा कुकुरलाई रेबिज विरुद्धको भ्याक्सिन लगाइएको गाउँपालिकाले जनाएको छ । स्थानीय निकायले प्रदान गरिने सेवा पुनः स्थापन तथा दर्ता प्रक्रियाबाट १३ हजार रुपैँया भन्दा बढी राजस्व सङ्कलन भएको गाउँपालिकाले जनाएको छ।
शिविरमा अध्यक्ष सुनुवारका साथै उपाध्यक्ष सावित्री सुनुवार, प्रमुख प्रशासकीय अधिकृत धनेन्द्र भुजेल, वडाध्यक्षहरू तथा सरकारी अधिकारीहरू सहभागिता थियो । शिविर गाउँपालिकाका सबै वडामा सञ्चालन गरिने गाउँपालिका अध्यक्ष सुनुवारले जानकारी दिए ।
