भैरहवा । सडक सुरक्षा अभिवृद्धि र ट्राफिक अनुशासन कायम गर्ने उद्देश्यले रुपन्देहीमा सञ्चालित विशेष आकस्मिक अनुगमन (सरप्राइज चेकिङ) का क्रममा सवारी चालक अनुमतिपत्र नभएका ४४ वटा ई-रिक्सा कारबाहीमा परेका छन् । विभिन्न निकाय तथा सर्वसाधारणबाट आएका गुनासो र सुझावलाई सम्बोधन गर्दै जिल्ला ट्राफिक प्रहरी कार्यालय रुपन्देहीले "अभियान सुरक्षित ई-रिक्सा यात्रा" अन्तर्गत यो कदम चालेको हो ।
जिल्ला ट्राफिक प्रहरी कार्यालय रुपन्देहीका प्रमुख प्रहरी निरीक्षक प्रतिमा कार्कीको कमाण्डमा खटिएको टोलीले सिद्धार्थनगर नगरपालिकाका विभिन्न व्यस्त क्षेत्रहरूमा आकस्मिक चेकिङ गरेको थियो । बुद्धचोक, लुम्बिनी गेट, देवकोटा चोक र भीम अस्पताल चोक लगायतका स्थानहरूमा गरिएको उक्त चेकिङका क्रममा अनुमतिपत्र बिना नै ई-रिक्सा गुडाउने चालकहरूलाई कानुनी कारबाहीको दायरामा ल्याइएको हो ।
ट्राफिक प्रहरीले बिना लाइसेन्स ई-रिक्सा चलाउनेहरूलाई कारबाही गर्नुका साथै सडक सुरक्षा, ट्राफिक नियमको पालना र जिम्मेवार चालकको भूमिकाबारे सचेतना समेत गराएको छ । सुरक्षित यात्रा सुनिश्चित गर्नका लागि अनिवार्य रूपमा लाइसेन्स लिएर मात्र जिम्मेवारीपूर्वक सवारी साधन चलाउन जिल्ला ट्राफिक प्रहरी कार्यालय रुपन्देहीले सबैमा हार्दिक अनुरोध गरेको छ ।
