सर्लाही । सर्लाही निर्वाचन क्षेत्र नम्बर ४ बाट प्रतिनिधिसभा सदस्यमा राष्ट्रिय स्वतन्त्र पार्टी (रास्वपा) का उम्मेदवार अमरेशकुमार सिंह विजयी भएका छन् । नेपाली कांग्रेसका सभापति गगनकुमार थापालाई फराकिलो मतान्तरले पराजित गर्दै सिंह निर्वाचित भएका हुन् । बिहीबार सम्पन्न अन्तिम मतपरिणामअनुसार विजयी सिंहले ३५ हजार ६८८ मत प्राप्त गरेका छन् । उनका निकटतम प्रतिद्वन्द्वी कांग्रेसका थापाले २२ हजार ८३८ मत पाए । यस क्षेत्रमा मतगणनाको प्रारम्भदेखि नै रास्वपाका सिंहले लगातार अग्रता कायम गरेका थिए ।
निर्वाचन अधिकृत विनोदप्रसाद घिमिरेका अनुसार तेस्रो स्थानमा रहेका नेकपा (एमाले) का उम्मेदवार अमनिशकुमार यादवले ९ हजार ३४३ मत प्राप्त गरेका छन् । त्यसैगरी, जनमत पार्टीका उम्मेदवार राकेश मिश्राले १ हजार ५७२ र नेपाल कम्युनिष्ट पार्टी (नेकपा) का उम्मेदवार रजनिश राय यादवले १ हजार ४०१ मत प्राप्त गरेको निर्वाचन अधिकृतको कार्यालयले जनाएको छ । कुल १ लाख २१ हजार १२ जना मतदाता रहेको यस निर्वाचन क्षेत्रमा ७७ हजार ९३१ मत खसेको थियो ।
