भैरहवा । विगत दुई दशकदेखि भैरहवा क्षेत्रमा सक्रिय पत्रकारिता गर्दै आउनुभएका पत्रकार मनोरञ्जन शर्माको शनिबार निधन भएको छ । दुई वर्षदेखि क्यान्सरबाट ग्रसित शर्माको रुपन्देहीको भैरहवास्थित सिद्धार्थनगर सिटी हस्पिटलमा उपचारका क्रममा बेलुकी ५ बजे निधन भएको हो ।
शर्मा कारोबार दैनिक, न्यूज ओके सम्पादक लगायत विभिन्न सञ्चार माध्यममा आबद्ध हुनुहुन्थ्यो । उहाँका श्रीमती, एक छोरी र एक छोरा छन् । पारिवारिक स्रोतका अनुसार शर्माको अन्तिम दाहसंस्कार स्याङ्जा र पाल्पाको सङ्गमस्थलमा रहेको राम्दी घाटमा गरिनेछ । लुम्बिनी प्रेस क्लब, रुपन्देहीका सल्लाहकार समेत रहनुभएका पत्रकार शर्माको निधनले सञ्चार क्षेत्रमा अपूरणीय क्षति पुगेको क्लबका अध्यक्ष कमल रायमाझीले बताउनुभयो । शर्माको निधनप्रति लुम्बिनी प्रेस क्लबसहित विभिन्न संघसंस्थाले दुःख व्यक्त गरेका छन् ।
