पाल्पा । सशस्त्र प्रहरी बल, नं ३५ गुल्म, हे. क्वा., पाल्पाले रैनादेवी छहरा गाउँपालिकाको कार्यालयमा विपद् सम्बन्धी जनचेतनामूलक कार्यक्रम सफलतापूर्वक सम्पन्न गरेको छ। यस कार्यक्रमको मुख्य उद्देश्य स्थानीय समुदायलाई विपद् जोखिम न्यूनीकरण र व्यवस्थापनका लागि आवश्यक ज्ञान र सचेतना प्रदान गर्नु रहेको थियो।
रैनादेवी छहरा गाउँपालिकाका प्रमुख प्रशासकीय अधिकृत कृष्ण प्रसाद ज्ञवालीको अध्यक्षतामा सम्पन्न भएको उक्त कार्यक्रममा सशस्त्र प्रहरी बलका वरिष्ठ अधिकारीहरूले विपद् सम्बन्धी महत्वपूर्ण अभिमुखीकरण प्रदान गर्नुभयो। कार्यक्रममा सशस्त्र प्रहरी बल, नं ३५ गुल्म, हे. क्वा., पाल्पाका प्रमुख सशस्त्र प्रहरी नायब उपरीक्षक झुपा कुमारी पन्थी र सशस्त्र प्रहरी नायव निरीक्षक दिपक न्यौपानेले विपद्का विभिन्न पक्ष, यसबाट बच्ने उपायहरू, र विपद्को समयमा अपनाउनुपर्ने सावधानीका बारेमा विस्तृत जानकारी दिनुभएको थियो।
सहभागीहरूलाई प्राकृतिक विपद् जस्तै भूकम्प, बाढी, पहिरो, आगलागी लगायतका घटनाहरूमा कसरी सुरक्षित रहने र समुदायमा कसरी सहयोग गर्ने भन्ने बारेमा व्यवहारिक ज्ञान प्रदान गरिएको थियो। कार्यक्रममा गाउँपालिकाका कर्मचारीहरूको उल्लेख्य सहभागिता रहेको थियो, जसले गर्दा विपद् व्यवस्थापन सम्बन्धी जानकारीलाई तल्लो तहसम्म पुर्याउन सहयोग पुग्ने विश्वास गरिएको छ। यस प्रकारका जनचेतनामूलक कार्यक्रमहरूले स्थानीय तहमा विपद् प्रतिकार्य क्षमता अभिवृद्धि गर्न र समुदायलाई थप सुरक्षित बनाउन महत्त्वपूर्ण भूमिका खेल्ने कुरामा जोड दिइएको छ।
