भैरहवा । प्रहरीले रुपन्देहीमा एटीएम तोडफोड गर्ने २ जनालाई नियन्त्रणमा लिएको छ। असोज ६ गते दिउँसो करिब साढे ४ बजे रोहिणी गाउँपालिका-३, धकधई बजारमा रहेको साइन रेसुङ्गा डेभलपमेन्ट बैंकको एटीएम तोडफोड गरेको आरोप प्रहरीले लगाएको छ ।
पक्राउ पर्नेमा रोहिणी गाउँपालिका-६ का २५ वर्षीय सुरज चौधरी र सोही गाउँपालिका-२ का २२ वर्षीय बिन्दु बानिया रहेको रुपन्देही प्रहरी प्रवक्ता प्रहरी नायब उपरिक्षक सुरज कार्कीले बताए । एटीएम फोडे पनि सो मा रहेको रकम भने चोरी नभएको कार्कीले जानकारी दिए ।
एटीएम फोडेको सूचना पाएलगत्तै इलाका प्रहरी कार्यालय धकधईबाट खटिएको टोलीले घटनामा संलग्न दुबै जनालाई नियन्त्रणमा लिएको हो। उनीहरूमाथि थप अनुसन्धान भइरहेको प्रहरी नायब उपरीक्षक तथा सूचना अधिकारी कार्कीले जानकारी दिए।
