भैरहवा । रुपन्देहीको ओमसतिया गाउँपालिकाले सबै सेवा एकै ठाउँबाट दिन घुम्ती शिविर सुरुआत गरेको छ । जनतालाई सहजरूपमा वडास्तरबाटै पालिकाका सेवा प्रदान गर्न गाउँपालिकाले एकीकृत घुम्ती शिविर आयोजना गरेको हो ।
वडाबाटै सेवा प्रदान गर्दा सेवाग्राहीलाई सहज हुने र समयको बचत हुने भएकाले ओमसतिया वडा नम्बर ६ बाट घुम्ती शिविर सुरु गरिएको गाउँपालिकाका अध्यक्ष मन्जित कुमार यादवले जानकारी दिनुभयो । सिहंदरबरको अधिकार गाउँगाउँमा भन्ने नारालाई प्रत्याभूत गर्न घरआँगनबाटै सेवा प्रदान गरिएको यादवको भनाइ छ । उहाँले भन्नुभयो, “गाउँपालिकाको कार्यालयमै आएर लिनुपर्ने सेवालाई जनताको घरदैलोमा पुर्याउने उद्देश्य हो, यसले गर्दा सेवाग्राहीलाई एकदिन छुट्याएर गाउँपालिका आउनुपर्ने बाध्यताको अन्त्य हुन्छ । घरआँगनमै स्थानीय सरकार गएपछि जनतालाई स्थानीय सरकारको प्रत्याभूति गराउन सकिन्छ ।”
गाउँपालिकाका उपाध्यक्ष सुनिता चौधरीले प्रत्येक आर्थिक वर्षमा गाउँपालिकाले वडास्तरमै पुगेर एकीकृत घुम्ती शिविर आयोजना गर्ने गरेको जानकारी दिनुभयो । प्रमुख प्रशासकीय अधिकृत विपिन क्षेत्रीका अनुसार पौष ३ गते वडा नं ६ मा, पौष ४ गते वडा नं ५ मा, पौष ५ गते वडा नं ४ मा, पौष ९ गते वडा नं ३ मा, पौष ८ गते वडा नं २ मा र पौष ७ गते वडा नं १ मा एकीकृत घुम्ती शिविर हुने छ ।
घुम्ती शिविरबाट विषयगत शाखा अन्तर्गतका योजना सम्झौता, सुझाव तथा परामर्श सेवा, जेष्ठ नागरिक स्वास्थ्य परीक्षण, उपचार व्यवस्थापन, परामर्श तथा औषधि वितरण गरिने क्षेत्रीले जानकारी दिनुभयो ।
कृषि शाखा अन्तर्गत नविनतम कृषि प्रविधि सम्बन्धि जानकारी, बालि उपचार तथा कृषि फर्म दर्ता नविकरण र पञ्जीकरण शाखा अन्तर्गत विभिन्न किसिमका घटना दर्ता तथा सामाजिक सुरक्षासम्बन्धी सेवा, महिला तथा बालबालिका शाखाअन्तर्गत ज्येष्ठ नागरिक परिचयपत्र र अपाङ्गता परिचयपत्रको विषयमा जानकारी प्रदान गरिनेछ ।
