अर्घाखाँची । अर्घाखाँचीको सन्धिखर्कस्थित साना सहरी खानेपानी तथा सरसफाई आयोजनाको निर्वाचनमा एमाले, कांग्रेस, माओवादी र राष्ट्रिय जनमोर्चाको बलियो संयुक्त गठबन्धनलाई पराजित गर्दै स्वतन्त्र उम्मेदवार बाबुराम भुसाल अध्यक्ष पदमा निर्वाचित हुनुभएको छ । भुसालले ५६३ मत प्राप्त गरी गठबन्धनका साझा उम्मेदवार युवराज केसीलाई १२० मतको फराकिलो अन्तरले पछि पार्दै जित हासिल गर्नुभएको हो ।
अध्यक्षसँगै बरिष्ठ उपाध्यक्ष बेदराज घिमिरे र कोषाध्यक्ष पदमा पनि स्वतन्त्र उम्मेदवार सरिता महत विजयी हुनुभएको छ भने उपाध्यक्ष, सचिव, सह-सचिव लगायत अन्य पदाधिकारी र सदस्यहरूमा भने गठबन्धनका उम्मेदवारहरूले नै बाजी मारेका छन् । निर्वाचन परिणाम अनुसार उपाध्यक्षमा गठबन्धनका भेष बहादुर केसी, सचिवमा जिबलाल पौडेल र सह-सचिवमा कल्पना पोख्रेल निर्वाचित हुनुभएको छ । जिल्लामा ठूला दलहरू एकठाउँ हुँदा पनि स्वतन्त्र उम्मेदवारले नेतृत्व हत्याउनुलाई दलहरूप्रतिको वितृष्णा र स्वतन्त्र उम्मेदवारप्रतिको बढ्दो जनलहरका रूपमा विश्लेषण गरिएको छ ।
