भैरहवा । रुपन्देहीको कोटहीमाई गाउँपालिकाका अस्थायी तथा ज्यालादारी कर्मचारीहरूले म्याद थप नगरिएको विरोधमा गाउँपालिकाको कार्यालयमा तालाबन्दी गरेका छन् । प्रमुख प्रशासकीय अधिकृत सतेन्द्र यादवले स्वीकृत दरबन्दीबाहेकका कर्मचारीको म्याद थप नहुने सूचना जारी गरेपछि असन्तुष्ट कर्मचारीहरूले अध्यक्ष, उपाध्यक्ष र प्रमुख प्रशासकीय अधिकृतको कार्यकक्षसहित मूल गेटमा तालाबन्दी गरेका हुन् ।
मध्यरातमा सूचना निकालेर वर्षौंदेखि कार्यरत कर्मचारीलाई हटाउन लागिएको भन्दै उनीहरूले शुक्रबार बिहानैदेखि सम्पूर्ण प्रशासनिक कामकाज ठप्प पारेका छन् । यता गाउँपालिका अध्यक्ष बालकृष्ण त्रिपाठीले भने उक्त सूचनाबारे जनप्रतिनिधि र कार्यपालिकालाई कुनै पूर्वजानकारी नभएको बताउनुभएको छ । कसैलाई पनि बेरोजगार नबनाइने प्रतिबद्धता जनाउँदै अध्यक्ष त्रिपाठीले कर्मचारी र गाउँपालिकाबीच देखिएको यो विवादलाई संवाद र कानूनी प्रक्रियामार्फत चाँडै समाधान गरिने स्पष्ट पार्नुभएको छ ।
