नवलपरासी । पश्चिम नवलपरासीको रामग्राम नगरपालिका वडा नं. ८ उनवचबाट प्रहरीले ठुलो परिमाणमा प्रतिबन्धित लागुऔषधसहित एक जनालाई पक्राउ गरेको छ। लागुऔषध नियन्त्रण व्यूरो शाखा कार्यालय भैरहवा र जिल्ला प्रहरी कार्यालयको संयुक्त टोलीले पूर्वबाट पश्चिमतर्फ आउँदै गरेको लु २६ प ४४१४ नम्बरको मोटरसाइकललाई चेकजाँच गर्ने क्रममा चालक ३८ वर्षीय राममिलन केवटलाई नियन्त्रणमा लिएको हो।
रामग्राम-लोहसडा बस्ने केवटको साथबाट प्रहरीले लुकाईछिपाई ल्याएको डाईजेपाम २०० एम्पुल, फेनेरागन २०० एम्पुल र बुप्रेनोर्फिन २०० एम्पुल गरी कुल ६०० एम्पुल लागुऔषध बरामद गरेको छ। जिल्ला प्रहरी कार्यालय नवलपरासीका सूचना अधिकारी एवं प्रहरी निरीक्षक सोम दास ढकालका अनुसार बरामद लागुऔषध र मोटरसाइकलसहित पक्राउ परेका केवटमाथि अदालतबाट म्याद थप गरी आवश्यक अनुसन्धान भइरहेको छ।
