काठमाडौं । सशस्त्र प्रहरी महानिरीक्षक राजु अर्यालले सीमा क्षेत्रबाट हुने चोरीनिकासी, पैठारी र अवैध आवतजावत रोक्न थप कडाइ गर्न निर्देशन दिएका छन् । मंगलबार सशस्त्र प्रहरी बल नेपाल प्रधान कार्यालयबाट भर्चुअल माध्यममार्फत सीमामा तैनाथ युनिट कमाण्डरहरुलाई सम्बोधन गर्दै उनले यस्तो निर्देशन दिएका हुन् ।
महानिरीक्षक अर्यालले सीमा सुरक्षामा खटिने सबै कमाण्डरहरुलाई जवाफदेही र जिम्मेवार बन्न तथा चेनअफ कमाण्ड कायम राख्न निर्देशन दिए । सीमा इलाकामा हुने अवैध चोरी तस्करी नियन्त्रणका लागि मुख्यालयले सुक्ष्म निगरानी गरिरहेको बताउँदै उनले कुनै कमीकमजोरी देखिए वा शंका लागेमा सम्बन्धित कमाण्डर नै छानबिन र कारबाहीको भागिदार बन्ने चेतावनी दिए ।
असल कार्यका लागि मुख्यालयको आदेश पर्खनु नपर्ने भन्दै अर्यालले हरेक कमाण्डरलाई मुलुक, जनता र संगठनको हितमा विवेक प्रयोग गर्न स्वतन्त्र रहेको स्पष्ट पारे । उनले सीमामा कार्यरत सुरक्षाकर्मीलाई आचरणविपरीत कार्य गर्नेमाथि कठोर बन्न र शंकास्पद व्यक्तिहरुलाई विशेष निगरानीमा राख्न पनि निर्देशन दिएका छन् ।
कार्यक्रममा सीमा सुरक्षा विभागका प्रमुख सशस्त्र प्रहरी अतिरिक्त महानिरीक्षक गणेशबहादुर ठाडामगरले सीमा अपराध रोकथामका लागि सरोकारवाला निकाय र स्थानीय बासिन्दासँगको समन्वय र सहकार्यमा जोड दिए । उनले सीमासम्बन्धी अभिलेखीकरण र त्यसका विविध पक्षबारे सबै तहका कमाण्डर जानकार हुनुपर्ने बताए । भर्चुअल बैठकमा सीमास्थित बाहिनी मुख्यालय, गण, गुल्म तथा बीओपीका कमाण्डरहरुले सीमा सुरक्षाको वर्तमान अवस्था, चुनौती र भावी योजनाबारे जानकारी गराएका थिए ।
