भैरहवा । रूपन्देही जिल्ला क्रिकेट संघको अध्यक्षमा हरिबहादुर थापा दोस्रो कार्यकालका लागि निर्वाचित भएका छन् । भैरहवामा सम्पन्न संघको ३०औं वार्षिक साधारणसभा तथा पाँचौं अधिवेशनबाट थापाले आफ्ना निकटतम प्रतिद्वन्द्वी शक्तिप्रसाद गौचनलाई २० मतले पराजित गरेका हुन् । कुल १ सय १९ मत खसेको निर्वाचनमा विजयी थापाले ६९ मत प्राप्त गर्दा गौचनले ४९ मत मात्रै पाए । यसअघि चार वर्षअघि भएको निर्वाचनमा पनि थापाले नै गौचनलाई पराजित गरेका थिए ।
प्यानल नै बनाएर चुनावी मैदानमा उत्रिएका दुई पक्षमध्ये दुई सदस्यबाहेक अन्य सबै पदमा थापा पक्षकै उम्मेदवारहरू विजयी भएका छन् । १५ सदस्यीय कार्यसमितिको उपाध्यक्षमा ६९ मतका साथ खेमराज भुसाल विजयी भए भने उनका प्रतिस्पर्धी सन्जीव जोशीले ४९ मत पाए । यसैगरी सचिवमा उदयकुमार मल्लिक ६८ मत र कोषाध्यक्षमा धीरज अधिकारी क्षेत्री ७७ मत ल्याएर निर्वाचित भएका छन् । उनीहरूका प्रतिस्पर्धी क्रमशः प्रथम पराजुलीले ४९ मत र सत्यजित सरकारले ४१ मत प्राप्त गरे ।
महिला सदस्य पदमा अलिसा केसीलाई पराजित गर्दै उमा अधिकारी ७७ मतका साथ निर्वाचित भइन् । अन्य १० जना खुल्ला सदस्यहरूमा प्रशान्तविक्रम मल्ल ८९, निरजप्रताप खाँण ७३, पुनित पोखरेल ६७, विजयसिंह ज्ञवाली ६४, मनोज भण्डारी ५९, अन्तिम थापा ५९, ज्वालेसप्रसाद प्रधान ५८, भुवन पाण्डे ५६, ताराप्रसाद पाठक ५६ र कृष्णकुमार कुँवर ५२ विजयी भएका छन् । मुख्य निर्वाचन अधिकृत कुलमणि ज्ञवालीका अनुसार सदस्यमा निर्वाचित भुवन पाण्डे र अन्तिम थापा मात्र गौचन पक्षका हुन् भने बाँकी सबै पदाधिकारी तथा सदस्यहरू थापा प्यानलकै रहेका छन् । कुल १२६ मतदाता रहेको संघको निर्वाचनमा १ सय १९ मत खसेको थियो ।
