रामेछाप । दोस्रो मन्थली नगर कप रनिङ शिल्ड पुरुष भलिबल प्रतियोगिताको उपाधि वडा नम्बर ७ भटौलीले जितेको छ ।
शनिबार भएको फाइनल खेलमा गत वर्षको विजेता टिम वडा नं १ मन्थलीलाई २२–२५, २३–२५, १९–२५ को सोझो सेटले हराउँदै उपाधि जितेको हो । उपाधिसँगै भटौलीले रनिङ शिल्डसँगै एक लाख रुपैयाँ नगद प्राप्त गरेको छ ।
उपविजेता मन्थली–१ ले नगद ७५ हजारमा चित्त बुझाएको छ । तेस्रो स्थानमा रहेको वडा नं ८ चिसापानीले ५० हजार रुपैयाँ प्राप्त गरेको छ । चिसापानीले वडा नं ४ सालुलाई २६–२४, २५–२० र २५–१९ को सोझो सेटले हराउँदै तृतीय स्थान प्राप्त गरेको हो ।
सान्त्वना भएको सालुले नगद ३० हजार प्राप्त गरेको छ । प्रतियोगितामा विधागततर्फ उत्कृष्ट खेलाडी, ब्लकर, डिफेन्डर र रेफ्रीलाई समेत ट्रफी, नगद प्रदान गरिएको छ । मन्थली नगरपालिका प्रमुख लब श्रेष्ठ, उपप्रमुख ईश्वरी बस्नेत, वडाध्यक्ष लगायतको उपस्थितिमा पुरस्कार वितरण गरिएको थियो ।
