भैरहवा । इन्धन तथा निर्माण सामग्रीमा भएको अत्यधिक मूल्यवृद्धिका कारण निर्माण उद्योग धराशयी भएको भन्दै लुम्बिनी निर्माण व्यवसायी संघ रुपन्देहीले सरकारसँग निर्माण क्षेत्रमा तत्काल ‘आपतकाल’ घोषणा गर्न माग गरेको छ । भैरहवामा आयोजित पत्रकार सम्मेलनमा संघका कार्यवाहक अध्यक्ष प्रितम रौनियारले मध्यपूर्वमा जारी युद्धका कारण इन्धनको मूल्य बढेको र बजारमा बिटुमिन, सिमेन्ट तथा डण्डी लगायतका सामग्रीको अभावसँगै मूल्यवृद्धि हुँदा निर्माण कार्य अगाडि बढाउन नसकिने अवस्था आएको बताउनुभयो ।
जिल्ला प्रशासन कार्यालयमार्फत सरकारको ध्यानाकर्षण गराउँदै संघले क्रसर उद्योगका समस्याले गर्दा समेत आयोजनाहरू प्रभावित भएको उल्लेख गरेको छ । निर्माण व्यवसायी महासंघ लुम्बिनी प्रदेशका उपाध्यक्ष नवराज श्रेष्ठले नेपाल राष्ट्र बैंकको मूल्य सूचकाङ्क व्यावहारिक नभएको र बजार भाउ बढ्दा पनि इन्डेक्समा घटेको देखिने त्रुटिका कारण व्यवसायीहरू मारमा परेको गुनासो गर्नुभयो । सरकारलाई पटक–पटक ध्यानाकर्षण गराउँदा पनि सुनुवाइ नभएको भन्दै संघले हालको कानुनी व्यवस्थाबाट मूल्य समायोजन असम्भव रहेकाले तत्काल ‘मूल्य समायोजन मार्गनिर्देशिका–२’ जारी गर्न र सबै ठेक्कामा म्याद थपको व्यवस्था गर्न आग्रह गरेको छ ।
यसैगरी बुटवल शाखाका अध्यक्ष बुद्धिराज थापाले सरकारको बेवास्ताका कारण व्यवसायीहरू ऋणमा डुब्ने अवस्था सिर्जना भएको बताउँदै लागत अनुसारको भुक्तानी र व्यावहारिक समाधान नभए समग्र निर्माण क्षेत्र नै बन्द हुने चेतावनी दिनुभयो । निर्माण कार्यको मुख्य सिजनमै सामग्रीको अभाव र महँगीले गर्दा आयोजनाहरू ठप्प हुने स्थितिमा पुगेकाले सरकारले तत्काल राहत प्याकेज ल्याउनुपर्नेमा व्यवसायीहरूले जोड दिएका छन् ।
