बाजुरा । बाजुराको त्रिवेणी नगरपालिका–९ ताम्सुमा अविरल वर्षासँगै आएको पहिरोमा पुरिएर एक जनाको मृत्यु भएको छ भने दुई जना गम्भीर घाइते भएका छन्। साउन २८ गते राति आएको पहिरोले घर पुरिँदा बेपत्ता भएकी स्थानीय २० वर्षीया प्रतीक्षा थापाको शव भग्नावशेषबाट निकालिएको हो।
घटनाको जानकारी पाउनासाथ जिल्ला प्रहरी कार्यालय बाजुराका प्रमुख प्रहरी नायव उपरीक्षक शैलेश्वरी बोहराको कमान्डमा आवश्यक उद्धार सामग्रीसहित खटिएको प्रहरी टोलीले खोजी तथा उद्धार कार्य सञ्चालन गरेको थियो। प्रहरीले पहिरोमा पुरिएका ४० वर्षीय धर्म थापा र ४० वर्षीया धौली देवी रावललाई जीवितै उद्धार गरी उपचारका लागि जिल्ला अस्पताल मार्तडी पठाएको छ। अविरल वर्षाका कारण पहिरोले घर पुरिएपछि उद्धार टोलीले मृतकको शव आवश्यक कानुनी प्रक्रिया पूरा गरी पोस्टमार्टमका लागि जिल्ला अस्पताल मार्तडी पुर्याएको जिल्ला प्रहरी कार्यालय बाजुराले जनाएको छ।
