काठमाडौँ। नेपाली कांग्रेसले सङ्गठन सुदृढीकरण, टाढिएका मतदाताको विश्वास पुनर्स्थापित गर्ने तथा आगामी स्थानीय तह निर्वाचनको तयारीका लागि मङ्गलबारदेखि देशव्यापी ‘हामी तयार छौँ’ अभियान सञ्चालन गर्ने भएको छ । पार्टी सभापति गगनकुमार थापाको नेतृत्वमा सञ्चालन हुने एकमहिने अभियानमा वडा तहदेखि केन्द्रसम्मका करिब तीन लाख नेता तथा कार्यकर्ता परिचालित हुने महामन्त्री प्रदीप पौडेलले जानकारी दिनुभयो ।
उहाँका अनुसार अभियानमा स्थानीय निर्वाचनका लागि प्राइमरी इलेक्सन प्रक्रिया, जिल्ला तथा प्रदेश अधिवेशन, पार्टीका नीति तथा गतिविधि जनतामाझ पुर्याउने र असन्तुष्ट मतदाताका गुनासा सुनेर पुनः पार्टीसँग जोड्ने कार्यलाई विशेष प्राथमिकता दिइने छ । हाल प्रमुख प्रतिपक्षमा रहेको कांग्रेसले राष्ट्रिय जिम्मेवारी पूरा गर्न आफू पूर्ण रूपमा तयार र प्रतिबद्ध रहेको सन्देश दिन यो अभियान सञ्चालन गर्न लागेको महामन्त्री पौडेलले बताउनुभयो ।