बुटवल । रुपन्देहीलाई कार्यथलो बनाएर एक दशकभन्दा बढी समयदेखि सक्रिय पत्रकारिता गर्दै आएका पत्रकार सुरेश परियार राष्ट्रियस्तरको ‘उत्कृष्ट युवा पुरस्कार–२०२५’ बाट सम्मानित भएका छन् । नेपाल जेसिजको ५२ औं राष्ट्रिय महाधिवेशनको अवसरमा परियारलाई नगद, स्वर्ण पदक र सम्मान पत्रसहित पुरस्कृत गरिएको हो । देशभरबाट गरिएको छनोटका आधारमा ‘प्रशासन तथा प्रचार’ पत्रकारिता क्षेत्रमा उल्लेखनीय योगदान पुर्याएको भन्दै नेपाल जेसिजले उनलाई एकल रूपमा यो विधाबाट छनोट गरेको थियो ।
महाधिवेशनको भव्य उद्घाटन सत्रमा उनलाई उक्त सम्मान प्रदान गरिएको हो । विगत एक दशकदेखि रुपन्देहीमा रहेर निरन्तर पत्रकारिताका माध्यमबाट समाजको आवाज बुलन्द पार्दै आएका परियारलाई उनको मेहनत र क्रियाशीलताको कदर गर्दै पुरस्कृत गरिएको जेसिजले जनाएको छ ।
नेपाल जेसिजले हरेक वर्ष विभिन्न विधामा समाजका लागि विशिष्ट योगदान पुर्याउने युवाहरूलाई सम्मान गर्दै आएको छ । सोही परम्पराअनुसार यस वर्ष पत्रकारिता र प्रचार क्षेत्रबाट परियारलाई यो गरिमामय पुरस्कार प्रदान गरिएको हो । राष्ट्रियस्तरको स्वर्ण पदकसहितको यो पुरस्कारले आफूलाई पत्रकारिता कर्ममा थप जिम्मेवार र उत्साहित बनाएको परियारले बताएका छन् ।
