भैरहवा । रुपन्देहीको दक्षिणी क्षेत्र मर्चवार अन्तर्गत कोटहीमाई गाउँपालिका वडा नम्बर ४ की प्रतिभा चौधरी गुणस्तरीय शिक्षा पाउने आशाले आफ्नो घरबाट पाँच किलोमिटर टाढा रहेको मर्चवारी गाउँपालिका–६ स्थित श्री ठर्की माध्यमिक विद्यालय जाने गरेकी छिन् ।
उनको गाउँमै विद्यालय छ । तर, गाउँमा रहेको विद्यालय भन्दा ठर्की माविमा राम्रो पढाइ हुन्छ भन्दै चौधरी पैदलै हिंडेर विद्यालय पुग्छिन् । विद्यालय जाने बाटोमा निर्माण भएको सानो पुल भाँचिदा विद्यालय पुग्न समस्याको सामना गर्नुको साथै ढिला पनि हुने गरेको उनको गुनासो छ । हाल कक्षा १० अध्ययनरत चौधरी भन्छिन्, ‘विद्यालयको समयमा धेरै विद्यार्थीहरु यही बाटो प्रयोग गर्छन् ।
त्यसैले एकैपटक यहाँ जाम हुन्छ, अर्को बाटो प्रयोग गर्दा निकै ढिला हुन्छ । कि जाममा केहीबेर कुर्नुपर्छ कि त हिलाम्य बाटोको प्रयोग गर्नुपर्छ । पुल भाँचिएपछि जुत्ता लगाउन पाइएको छैन सधै चप्पल लगाएर विद्यालय आउनुपरेको छ ।’
विद्यालय पुग्न निर्माण गरिएको सडकमा पर्ने एकजना जग्गाधनीको सहमति नहुँदा फराकिलो सडक निर्माण हुन सकेन । सडक निर्माण नहुँदा विद्यालय पुग्न कामचलाउ पुल निर्माण गरी आवतजावत भइरहेको थियो । तर, मंगलबार अज्ञात व्यक्तिहरुले उक्त पुल भत्काइदिएपछि अहिले विद्यालय आउने–जाने १ हजार भन्दा बढी विद्यार्थीहरु मारमा परेका छन् ।
सोही विद्यालयकामा अध्ययनरत खुलाब कुमार खटिक भन्छन्, ‘कहिले हिलाम्य सडकको प्रयोग त कहिले विद्यालयमा समयमै पुग्न समस्या भएको छ । अज्ञात व्यक्तिहरुले पुल भाँचेपछि विद्यालय समयमा एकैपटक विद्यार्थीहरुको चाप बढी भएकोले मर्कामा परेका छौं । ’
यस्ता समस्या उक्त बाटो प्रयोग गर्ने हरेक विद्यार्थी तथा शिक्षकहरुले सामना गर्नुपरेको छ । अज्ञात ब्यक्तिहरुले पुल भाँचिदिएपछि अहिले विद्यार्थीहरु खेतको आलीको बाटो प्रयोग गर्न बाध्य छन् । अहिले वर्षाको समय भएकाले खेतमा पानी भरिएको छ । खेतको आली हिलाम्य छ ।
विद्यालय पुग्न बाटोको रुपमा आली प्रयोग गरिएको थियो तर, एकजनाबाहेक अन्य किसानहरुको सहमतिमा १० फिटको बाटो निर्माण गरी पीसीसी ढलान गरिएको थियो । तर, बीचमा अधुरो रहेको ठाउँमा आली जतिको फराकिलो पुल निर्माण भएपछि विद्यार्थीहरुलाई विद्यालय पुग्न सहज भएको थियो ।
‘गोरेटो बाटोलाई विभिन्न निकायमा पहल गरी फराकिलो बनाई पिसीसी निर्माण गरी विद्यार्थी तथा शिक्षकलाई आवतजावतमा सहज भएको थियो, ’विद्यालयका प्रधानाध्यापक बलिराम यादवले भने । खेतको पानी बग्ने ठाउँमा विद्यालयको लागतमा २०६७ सालमा निर्माण गरिएको सानो पुललाई अज्ञात समुहले भाँचेपछि सबैलाई समस्या भएको उनले बताए ।
पुलको ठाउँमा ह्युमपाइप राखेर व्यवस्थित बनाउन खोजिए पनि उक्त क्षेत्रमा जग्गा रहेको जग्गाधनीले नमानेपछि अहिले ह्यूमपाइप सोही ठाउँमा राखिएको छ । पुल भाँचिएपछि साना विद्यार्थीहरु विद्यालय आउन छोडेको भन्दै प्रधानाध्यापक यादवले चिन्ता व्यक्ति गरे ।
घटनाबारे प्रहरीलाई जानकारी गराइएको भन्दै उनले सम्बन्धित सरोकारवालाहरु पुल निर्माणमा सहयोग गर्नुपर्ने उनको आग्रह छ ।
