भैरहवा । लुम्बिनी विश्व शान्ति मञ्चले विश्व सिमसार दिवसको अवसरमा पत्रकार रबिन्द्र प्रताप गुप्तालाई सम्मान गरेको छ । पत्रकारिताको माध्यमबाट वातावरणीय सचेतनाको क्षेत्रमा पुर्याएको योगदानको कदर गर्दै मञ्चले लुम्बिनीमा आयोजित एक कार्यक्रमका बीच गुप्तालाई नगद १० हजार ५ रुपैयाँ र सम्मान–पत्रसहित सम्मान गरेको हो । विगत एक दशकदेखि पत्रकारितामा सक्रिय गुप्ता खबरपात्रो डटकम, बुद्ध सामुदायिक टेलिभिजन, प्राइम टेलिभिजन र राष्ट्रिय समाचार समिति (रासस) लगायत विभिन्न पत्रकारजन्य संस्थाहरूमा आबद्ध हुनुहुन्छ ।
कार्यक्रममा पत्रकार गुप्ताका साथै संगीतकार महेश ज्ञवाली, चित्रकलाकर्मी नरबहादुर विश्वकर्मा र होटल व्यवसायी लिलामणि शर्मालाई पनि सम्मान गरिएको थियो । सोही अवसरमा मञ्चले लुम्बिनी आधारभूत विद्यालयका १० जना विद्यार्थीलाई जनही ५ हजारका दरले छात्रवृत्ति र विद्यालयलाई १० हजार गरी कुल ६० हजार रुपैयाँ आर्थिक सहयोग प्रदान गरेको छ ।
मञ्चका अध्यक्ष बासु गौतमका अनुसार दिवसको अवसरमा विद्यालय परिसर तथा अन्य स्थानमा गरी २५० भन्दा बढी बिरुवा समेत रोपिएको छ । कार्यक्रममा उपस्थित राजकीय बौद्ध विहारका प्रमुख सागर धम्म, सन नेपाल लाईफ इन्स्योरेन्सका सीईओ राजकुमार अर्याल लगायतका वक्ताहरूले पानीका स्रोत र सिमसार क्षेत्रको संरक्षण गर्दै वातावरण जोगाउनुपर्नेमा जोड दिनुभएको थियो ।
