राजविराज । सप्तरीको डाक्नेश्वरी नगरपालिका–५, महादेवा टोलबाट प्रहरीले ठूलो परिमाणमा लागुऔषध गाँजा बरामद गरेको छ । नेपाल प्रहरी र सशस्त्र प्रहरी बलको संयुक्त टोलीले शुक्रबार बिहान चन्द्र नहरको डिल नजिकैको धान खेत तथा बाँसघारीमा बेवारिसे अवस्थामा राखिएको ३९६ किलोग्राम गाँजा बरामद गरेको हो ।
जिल्ला प्रहरी कार्यालय, सप्तरीका प्रवक्ता तथा प्रहरी नायव उपरीक्षक जितेन्द्रकुमार बस्नेतका अनुसार, विशेष सूचनाको आधारमा खटिएको प्रहरी टोलीले १७ वटा पोकामा प्याक गरी फालिएको अवस्थामा उक्त परिमाणको गाँजा फेला पारेको थियो । बरामद गरिएको गाँजालाई थप अनुसन्धानका लागि इलाका प्रहरी कार्यालय, कल्याणपुरमा राखिएको प्रहरीले जनाएको छ ।
प्रहरीले घटनास्थलमा ६ वटा पोका र त्यसको ३०० मिटर पश्चिममा थप ११ वटा पोका फेला पारेको थियो । यो घटनाले यस क्षेत्रमा लागुऔषध तस्करीको सक्रियतालाई पुनः उजागर गरेको छ । प्रहरीले यस विषयमा थप अनुसन्धान अगाडि बढाएको जनाएको छ ।
