बाँके । लुम्बिनी प्रदेशका मुख्यमन्त्री चेतनारायण आचार्यले चालु आर्थिक वर्षमा विनियोजन भएको बजेट सही ढंगले कार्यान्वयन गर्न आग्रह गरेका छन् । बाँकेको कोहलपुर नगरपालिकामा बुधवार जनप्रतिनिधि तथा कर्मचारीहरुसँगको छलफल कार्यक्रमलाई सम्बोधन गर्दै मुख्यमन्त्री आचार्यले चालु आर्थिक बर्षमा बाँके जिल्लालाई उच्च प्राथमिकतामा राखेर बजेट विनियोजन भएको र बजेटको सही ढंगले कार्यान्वयन गर्न आग्रह गरेका हुन् ।
बाँके जिल्लामा पूँजीगततर्फ २ अर्ब ४२ करोड बजेट विनियोजन भएको र पाँच लाख भन्दा माथिका सबै आयोजनालाई प्रतिष्पर्धाको माध्यमबाट कार्यान्वयन गर्न निर्देशन दिए । ‘सरकारले विनियोजन गरेको बजेटको सही ढंगले कार्यान्वयन भएको छ वा छैन त्यसलाई अनुगमन गर्नुस्’मुख्यमन्त्री आचार्यले भने–‘बजेट कार्यान्वयनलाई प्रभावकारी बनाउन जरुरी छ ।’
कोहलपुरमा यातायात सेवा कार्यालय स्थापना तत्काल गरिने उनले जानकारी दिए । ‘कार्यालय भवन र कार्यालय सहयोगी नगरपालिकाले उपलब्ध गराउने सहमति भएको छ । प्रदेश सरकारबाट कर्मचारी नियुक्त गरेर पठाउँछौंं’उनले भने,‘छिटो सेवा सुरु गर्ने योजना अनुसार काम अघि बढेको छ ।’
कोहलपुर नगरपालिकाका कार्यबाहक नगरप्रमुख संगिता सुवेदीले कोहलपुरमा यातायात सेवा कार्यालय स्थापनासँगै समग्र विकासका योजनाहरुको बारेमा मुख्यमन्त्रीको ध्यानाकर्षण गराएको बताए । ‘समग्र कोहलपुरको विकासको बारेमा छलफल भयो । साथै यातायात सेवा कार्यालय स्थापनाको बारेमा पनि ध्यानकर्षण गराएका छौं । यस बारेमा मुख्यमन्त्रीज्यू सकारात्मक हुनुहुन्छ’उनले भने,‘छिट्टै यातायात सेवा कार्यालय स्थापना हुने विश्वास दिलाएका छन् ।’
