कञ्चन । लैंगिक हिंसा विरुद्धको १६ दिने अभियानको समापनका अवसरमा रुपन्देहीको कञ्चन गाउँपालिकामा महिला तथा बालिका विरुद्ध हुने हिंसा रोकथामसम्बन्धी एक दिने क्षमता विकास तालिम सम्पन्न भएको छ । सिर्जनशिल संस्था नेपाल र महिला कानुन र विकास मञ्चको सहकार्यमा आयोजित उक्त तालिममा महिला जनप्रतिनिधि तथा राजनीतिक दलका महिला अगुवाहरूको सहभागिता थियो । कार्यक्रममा प्रशिक्षक प्रतिमा शर्माले महिला अधिकार, हिंसाका प्रकार र कानुनी उपचारबारे प्रशिक्षण दिनुभएको थियो ।
कार्यक्रममा गाउँपालिका अध्यक्ष नवराज ढकालले समाजलाई विकृत बनाउने हिंसा अन्त्यका लागि कानुनी सचेतना र सामूहिक प्रतिवाद आवश्यक रहेको बताउनुभयो । त्यस्तै, उपाध्यक्ष मौसमी थापा मगरले महिलाहरू कानुनी रूपमा सचेत भए मात्र पालिकालाई हिंसा सुरक्षित बनाउन सकिने र नीतिगत पहलमा महिलाको सशक्तिकरण आवश्यक रहेकोमा जोड दिनुभयो ।
सोही अवसरमा कार्यपालिका सदस्य कुमारी घर्ति मगरको संयोजकत्वमा 'अन्तर पार्टी महिला सञ्जाल' समेत गठन गरिएको छ। समितिका सदस्यहरूमा उजेली बि.क., तारा कार्की, पार्वती ढकाल, शान्ति घिमिरे र चेलिका भूजेल रहनुभएको छ। कार्यक्रममा सिर्जनशिल संस्थाकी सोना न्यौपानेले सञ्जालको भूमिकाबारे प्रकाश पार्नुभएको थियो भने कार्यक्रमको सहजीकरण गंगा घिमिरेले गर्नुभएको थियो ।
