नवलपरासी । जिल्ला प्रहरी कार्यालय नवलपरासी र लागूऔषध नियन्त्रण ब्युरो शाखा कार्यालय भैरहवाको संयुक्त टोलीले पश्चिम नवलपरासीको रामग्राम नगरपालिका–१ सन्डाबाट ठूलो परिमाणमा लागूऔषधसहित एक जनालाई पक्राउ गरेको छ।स्थानीय ३० वर्षीय गणेश गुप्ताको घरमा छापा मारी फाइबरको झोलामा लुकाइराखिएको अवस्थामा डाइजापाम ३ सय ९६ एम्पुल, फेनेरगन ४ सय ५६ एम्पुल र ब्रोफिन ४ सय ९१ एम्पुल बरामद गरिएको जिल्ला प्रहरी कार्यालय परासीका सूचना अधिकारी डीएसपी मदन थापाले जानकारी दिनुभयो।
नियन्त्रणमा लिइएका गुप्ताविरुद्ध लागूऔषधसम्बन्धी कसुरमा मुद्दा दर्ता गरी थप अनुसन्धान भइरहेको प्रहरीले जनाएको छ।यसैबिच, प्रहरीले जिल्लाको पाल्हीनन्दन गाउँपालिका–५ बाट पनि लागूऔषध डाइजेपामसहित दुई जना भारतीय नागरिकलाई पक्राउ गरेको छ। पक्राउ पर्नेमा भारत उत्तर प्रदेश महाराजगञ्जका ३३ वर्षीय सबेरे आलम र १६ वर्षीय एक किशोर रहेका छन्।
