पश्चिम नवलपरासी । सुस्ता गाउँपालिका वडा नं २, कुडिया: माटोको गन्ध र कलाको स्पर्शले यहाँको एउटा परिवारको जीवनलाई नयाँ आकार दिएको छ। सुकई प्रसाद दुसाद र उहाँकी श्रीमती निर्मला दुसाद, जसले आफ्नो जीवन माटोका मूर्तिहरूमा समर्पित गरेका छन्, उनीहरूको कथा संघर्ष, परिवर्तन र दृढ संकल्पको एउटा प्रेरणादायी उदाहरण हो ।
आठ वर्षअघिसम्म सुकई प्रसाद घर बनाउने मिस्त्रीको काम गर्नुहुन्थ्यो भने निर्मला खेतमा ज्याला मजदुरी गर्नुहुन्थ्यो। तर समयसँगै उनीहरूको जीवनले नयाँ मोड लियो। माटोको मूर्ति बनाउने पेसामा लागेपछि उनीहरूको दैनिकी पूर्ण रूपमा बदलियो। अहिले दुवै जना मिलेर माटोका आकर्षक मूर्तिहरू बनाउने र बेच्ने काम गर्नुहुन्छ, जसले उनीहरूको घरखर्च चलाउँछ र पाँच जनाको परिवार पाल्न मद्दत गर्छ ।
सुकई प्रसाद र निर्मला दुसादले यो पेसामा लागेको आठ वर्ष भइसकेको बताउनुहुन्छ। उहाँहरूको घरमा तीन जना छोराहरू छन्, जसले पढाइका साथसाथै आमाबुवालाई मूर्ति बनाउने काममा पनि सघाउँछन्। यो परिवारको संयुक्त प्रयासले उनीहरूको कलालाई जिवन्त राखेको छ र पुस्तान्तरणको सम्भावनालाई पनि उजागर गरेको छ ।
माटोको मूर्ति बनाउने कला केवल एउटा पेसा मात्र होइन, यो उनीहरूको लागि जीवन जिउने आधार र आत्मसन्तुष्टिको माध्यम पनि हो। उनीहरूका हातहरूले माटोलाई विभिन्न देवी-देवताका स्वरूप, जनावरका आकृति र अन्य कलात्मक रूपहरू दिन्छन्, जसलाई स्थानीय बजार र मेलाहरूमा बिक्री गरिन्छ। उनीहरूका मूर्तिहरूले ग्राहकहरूको मन जित्नुका साथै परम्परागत कला र संस्कृतिको संरक्षणमा पनि योगदान पुर्याएका छन्।
