अर्घाखाँची । अर्घाखाँची जिल्लामा भएको मोटरसाइकल दुर्घटनामा दुई जना युवाले ज्यान गुमाएका छन् भने एक जना गम्भीर घाइते भएका छन् । जिल्ला प्रहरी कार्यालय अर्घाखाँचीका अनुसार, यो दुर्घटना पाणिनि गाउँपालिका–३ दुर्घाफाटमा भएको हो ।
प्रहरीका अनुसार, निगालीबाट दुर्घाफाटतर्फ आउँदै गरेको ना ३६ प ३५०९ नम्बरको मोटरसाइकल अनियन्त्रित भई दुर्घटनाग्रस्त भएको थियो । दुर्घटनामा मोटरसाइकल चालक १८ वर्षीय गौतम विक र पछाडि सवार २४ वर्षीय सागर विकको मृत्यु भएको छ । दुवै जनालाई जिल्ला अस्पताल सन्धिखर्क पुर्याउँदा चिकित्सकहरूले मृत घोषणा गरेको प्रहरीले जनाएको छ । मृतक दुवै पाणिनि गाउँपालिका–४ निगालीका बासिन्दा थिए।
सोही मोटरसाइकलमा सवार २५ वर्षीय सन्तोष घर्ती भने गम्भीर घाइते भएका छन् । उनको टाउकोमा चोट लागेको र हाल गुल्मीको खज्र्याङमा प्रारम्भिक उपचार भइरहेको छ । थप उपचारका लागि उनलाई पाल्पा रिफर गरिएको प्रहरीले जानकारी दिएको छ । घटनास्थलको थप अनुसन्धान भइरहेको प्रहरीले जनाएको छ ।
