काठमाडौं । काठमाडौंको नागार्जुन नगरपालिका–६ सीतापाइलामा बुधबार परिवारका तीन सदस्यको हत्या गरेर गरेर एक जनाले आत्महत्या गरेका छन् ।
श्रीमती ३९ वर्षीया ईश्वरी श्रेष्ठ घिमिरे, छोरीहरु ८ वर्षीया अनिशा र २ वर्षीया शिवानीको हत्या गरेका राजु घिमिरेको शव नागार्जुनको जंगलमा पासो लगाइ झुण्डिएको अवस्थामा भेटिएको प्रहरीले जनाएको छ ।
ईश्वरीसहित दुई बालिकाको शव कोठामा फेला परेको थियो । श्रीमान कोठामा थिएनन् । पछि परिवारको हत्या गरेको शंकामा खोजीमा खटिएको प्रहरीले उनको शव नागार्जुनको जंगलमा झुण्डिएको अवस्थामा फेला पारेको जनाएको छ ।
घरमा भेटिएका शवमा धारिलो हतियारका चोटहरू छन् । घटनाको प्रकृतिको आधारमा राजुले श्रीमतीसहित दुई छोरीको हत्या गरेपछि आत्महत्या गरेको देखिए पनि पुष्टि हुन बाँकी रहेको प्रहरीले जनाएको छ । राजु र ईश्वरी दैनिक ज्यालादारी काम गर्दै आएका थिए ।
घटनाबारे काठमाडौं उपत्यका अपराध अनुसन्धान कार्यालयसहितको टोलीले अनुसन्धान गरिरहेको छ ।
