स्याङ्जा । स्याङ्जाको चापाकोट नगरपालिकाले इलाका प्रहरी कार्यालय चापाकोटलाई ६ थान सीसीटीभी क्यामेरा हस्तान्तरण गर्नुका साथै सम्मान गरेको छ। शान्ति सुरक्षा, अपराध नियन्त्रण तथा ट्राफिक व्यवस्थापनलाई प्रविधिमैत्री र प्रभावकारी बनाउने उद्देश्यले नगरपालिकाको सहयोगमा ती क्यामेरा जडान गरी हस्तान्तरण गरिएको हो।
चापाकोट नगरपालिकाको वडा नं ९ र १० का विभिन्न प्रमुख स्थानमा जडान गरिएका क्यामेराको प्रत्यक्ष निगरानी इलाका प्रहरी कार्यालयबाटै हुने गरी नगर प्रमुख देवबहादुर खाँणले सो क्यामेरा हस्तान्तरण गर्नुभयो। सोही अवसरमा चापाकोट क्षेत्रमा शान्ति सुरक्षा कायम गर्न, अपराध रोकथाम तथा नागरिकको जीउधनको सुरक्षामा उत्कृष्ट भूमिका निर्वाह गरेको भन्दै नगरपालिकाका तर्फबाट इलाका प्रहरी कार्यालय चापाकोटलाई सम्मान–पत्र प्रदान गरिएको प्रहरी नायब उपरीक्षक गणेश सापकोटाले जानकारी दिनुभयो।
