मुगु । छायाँनाथ राराका नगरप्रमुख विष्णुकुमार भामले ७ सय विद्यार्थीका पठनपाठनको जिम्मा लिएका छन् । नगरपालिकाका १४ वटै वडा समेटेर अति विपन्न परिवारका ७ सय बालबालिकालाई आफ्नो कार्यकालभरि पठनपाठनका लागि आवश्यक सामग्री सहयोग गर्ने जिम्मा लिएका हुन् ।
छायाँनाथ रारा नगरपालिकाका ४५ वटा सामुदायिक विद्यालयमा पढ्ने आधारभूत तहमा १० जना र माध्यमिकमा १५ जना गरेर अति विपन्न, दलित, गरिब ७ सय विद्यार्थी छनोट गरिएको हो ।
वडाध्यक्ष, विद्यालय व्यवस्थापन समिति र विद्यालयले अति विपन्न विद्यार्थी भएको भन्ने सिफारिसका आधारमा विद्यार्थीहरुलाई छनोट गरिएको नगरप्रमुख भामको सचिवालयले जनाएको छ ।
नगरप्रमुखसँग बालबालिका कार्यक्रम कार्यविधि–२०७९ जारी गरेर प्रमुख भामले विपन्नको पठनपाठनमा सघाउने योजना अघि सारेका बताएका छन् ।
‘७ सय विद्यार्थीको अभिभावकत्वका साथ उनीहरुको पढाइका लागि स्टेसनरी सामाग्री, विद्यालय पोसाक सहयोग गर्न कार्यक्रमको थालनी गरेका हौं,’ नगरप्रमुख भामले भने ।
आइतबार १०, १३ र १४ नम्बर वडाको एउटा माध्यमिक र ८ वटा आधारभूत विद्यालयका ९५ जना विपन्न विद्यार्थीहरुलाई न्यानो कपडा वितरण गरिएको उनले बताए ।
