कञ्चन । नेपाल मगर संघ गणतन्त्र कोरिया, किम्हे/बुसान शाखाले राष्ट्रिय आविष्कार केन्द्र (नेपाल) लाई १० लाख रुपैयाँ आर्थिक सहयोग हस्तान्तरण गरेको छ। गत २८ जनवरी २०२५ मा आयोजित “झोले सांगीतिक सौगात भाग–२” कार्यक्रमबाट संकलित रकममध्ये खर्च कटाएर बचत भएको १० लाख रुपैयाँ सहयोग गरिएको हो।
उक्त रकम संघका संस्थापक अध्यक्ष राजकुमार आले मगर (प्रेम) र पूर्व अध्यक्ष युद्ध सलामी मगरले संयुक्त रूपमा आविष्कार केन्द्रलाई हस्तान्तरण गर्नुभएको हो। खेम सेञ्चुरी, शिव परियार, देवी गर्वुजा मगर, बिमता घर्ति मगर र सुन्दर घलान जस्ता चर्चित कलाकारहरूको सहभागिता रहेको उक्त कार्यक्रम सफल बनाउन सहयोग गर्ने सम्पूर्ण कोरियावासी नेपाली तथा संघ–संस्थाहरूलाई आयोजकले आभार व्यक्त गरेको छ। समय व्यवस्थापनका कारण सहयोग हस्तान्तरणमा केही ढिलाइ भएकोमा क्षमा माग्दै, संस्थाका प्रतिनिधि युद्ध सलामी मगरले आगामी दिनमा पनि यस्ता सामाजिक कार्यमा निरन्तर सहकार्य र सहयोग रहने प्रतिबद्धता व्यक्त गर्नुभएको छ।
