हेटौँडा । मकवानपुर प्रहरीले ठूलो परिमाणमा नियन्त्रित औषधि ट्रामाडोलसहित एक जनालाई पक्राउ गरेको छ भने एक जना फरार भएका छन् । जिल्ला प्रहरी कार्यालय मकवानपुरबाट खटिएको टोलीले हेटौँडा उपमहानगरपालिका-१३, आदामारबाट स्थानीय ३० वर्षीय प्रविन लामालाई पक्राउ गरेको हो । सोमबार राति करिब ८ बजे आदामारस्थित सडकमा शंकास्पद रूपमा हिँडिरहेका लामालाई प्रहरीले जाँच गरेको थियो । खानतलासीका क्रममा उनको साथबाट ३ हजार क्याप्सुल ट्रामाडोल बरामद भएको थियो।
पक्राउ परेका लामासँगको प्रारम्भिक सोधपुछका क्रममा उनले उक्त लागूऔषध हेटौँडा-१२ बस्ने अर्का व्यक्तिबाट खरिद गरेको बयान दिएका थिए। लामाको बयानको आधारमा प्रहरी टोली बिक्री गर्ने भनिएका व्यक्तिलाई पक्राउ गर्न गएको थियो । तर, ती व्यक्तिले प्रहरीलाई देख्नासाथ आफूले बोकेको झोला फालेर भागेका थिए ।
प्रहरीले उक्त झोला खोलेर हेर्दा थप ६ हजार क्याप्सुल ट्रामाडोल फेला पारेको हो । प्रहरीले बरामद गरिएको कुल ९ हजार क्याप्सुल ट्रामाडोलसहित प्रविन लामालाई नियन्त्रणमा लिएको छ । पक्राउ परेका लामालाई मकवानपुर जिल्ला अदालतबाट लागूऔषध मुद्दामा म्याद थप गरी अनुसन्धान अघि बढाइएको छ। फरार रहेका अर्का व्यक्तिको खोजी कार्य तीव्र पारिएको जिल्ला प्रहरी कार्यालय मकवानपुरले जनाएको छ ।
