काठमाडौं । काठमाडौंको जय नेपाल हल नजिकैबाट स्रोत नखुलेको १० लाख रुपैयाँभन्दा बढी नगदसहित प्रहरीले दुई जनालाई पक्राउ गरेको छ । काठमाडौं महानगरपालिका–१ स्थित जय नेपाल हल क्षेत्रबाट स्रोत खुलाउन नसकेको १० लाख ६३ हजार ८४० रुपैयाँसहित उनीहरु पक्राउ परेका हुन् । पक्राउ पर्नेहरुमा रामेछापको खाँडादेवी गाउँपालिका–५ घर भई हाल काठमाडौंको कपन बस्दै आएका २७ वर्षीय दिपक श्रेष्ठ र २५ वर्षीय सुनिल श्रेष्ठ रहेको नेपाल प्रहरीको केन्द्रीय समाचार कक्षले जनाएको छ । उनीहरुलाई प्रहरी वृत्त दरबारमार्गबाट खटिएको प्रहरी टोलीले नियन्त्रणमा लिएको हो ।
प्रहरीका अनुसार हिटीपोखरीबाट नागपोखरीतर्फ जाँदै गरेको बागमती प्रदेश ०२–५२ प ६९९४ नम्बरको स्कुटरमा सवार उनीहरुलाई शंका लागेर चेकजाँच गर्ने क्रममा उक्त परिमाणको नगद फेला परेको थियो । साथमा रहेको रकमको वैध स्रोत खुलाउन नसकेपछि प्रहरीले उनीहरुलाई स्कुटर र नगदसहित नियन्त्रणमा लिएको हो । पक्राउ परेका दुवै जनामाथि अहिले आवश्यक अनुसन्धान भइरहेको प्रहरीले जनाएको छ । उनीहरुले उक्त रकम कहाँबाट ल्याएका हुन् र कुन प्रयोजनका लागि लैजाँदै थिए भन्ने विषयमा विस्तृत छानबिन भइरहेको छ ।
