अर्घाखाँची । शान्ति सुरक्षा र अमनचयनमा खटिने सशस्त्र प्रहरीले अर्घाखाँचीको एक विद्यालयमा श्रमदान गरेर प्याराफिट बस्ने स्थान निर्माण गरेको छ । जिल्लाको सन्धिखर्क नगरपालिका–२ स्थित श्री भगवती माध्यमिक विद्यालयमा रहेको ३० वर्ष पुरानो प्याराफिट जीर्ण भएपछि सशस्त्र प्रहरी बल नेपाल नं. ३६ गुल्मले पुनःनिर्माण गरेको हो ।
सन्धिखर्क नगरपालिकाको सहयोग र सशस्त्र प्रहरीको जनशक्ति प्रयोग गरी करिब दुई महिना लगाएर उक्त प्याराफिट निर्माण गरिएको गुल्मपति डिएसपी योगनारायण दाहालले जानकारी दिए । नवनिर्मित प्याराफिटमा विद्यार्थीहरूलाई बस्न, पढ्न तथा विद्यालयका अतिरिक्त क्रियाकलाप अवलोकन गर्न सहज हुनेछ । शान्ति सुरक्षा, द्वन्द्व व्यवस्थापन र लागुऔषध नियन्त्रण जस्ता नियमित जिम्मेवारीका अलावा सशस्त्र प्रहरीले गरेको यो रचनात्मक कार्यले जनताको मन जित्ने विश्वास लिइएको छ ।
