भैरहवा । जिल्ला प्रशासन कार्यालय रुपन्देहीले जिल्लाभित्र रहेका इजाजत प्राप्त हातहतियारहरू बुझाउन सार्वजनिक आग्रह गरेको छ । आसन्न प्रतिनिधिसभा सदस्यको निर्वाचनलाई मध्यनजर गर्दै सुरक्षा व्यवस्था मजबुत बनाउन प्रशासनले यस्तो आग्रह गरेको हो । रुपन्देहीका सहायक प्रमुख जिल्ला अधिकारी एवं सूचना अधिकारी मेघनाध पाध्याका अनुसार, निर्वाचनलाई भरपर्दो, विश्वसनीय र शान्तिपूर्ण बनाउने उद्देश्यले जिल्लाभित्र सर्वसाधारणसँग रहेका इजाजत प्राप्त हातहतियार तथा खरखजानाहरू संकलन गर्न लागिएको हो ।
प्रशासनले जारी गरेको सूचनामा यही माघ १५ गतेभित्र जिल्ला प्रहरी कार्यालय वा आफूलाई पायक पर्ने नजिकको प्रहरी इकाईमा हतियार बुझाउन निर्देशन दिइएको छ । प्रशासनले निर्वाचन सम्पन्न भएको एक महिनापछि सम्बन्धित धनीलाई हतियार फिर्ता गरिने स्पष्ट पारेको छ । साथै, तोकिएको समयसीमाभित्र हतियार नबुझाएको पाइएमा कानुन बमोजिम कडा कारबाही हुने चेतावनी समेत जिल्ला प्रशासन कार्यालय रुपन्देहीले दिएको छ ।
