नवलपरासी । सुनवल नगरपालिका–१ शान्तीटोलस्थित एक घरमा चोरी गरेको आरोपमा प्रहरीले दुई जनालाई पक्राउ गरेको छ। मानिस नभएको मौका छोपी साढे दुई तले घरको मूल ढोकाको च्यानल गेटको ताला फुटाएर भित्र पसी सुनचाँदीका गरगहना तथा अन्य इलेक्ट्रोनिक्स सामान चोरी गरेको अभियोगमा उनीहरू पक्राउ परेका हुन्।
पक्राउ पर्नेहरूमा सुनवल नगरपालिका–३ खैरेनीका २३ वर्षीय ऋषिराम कवँर र २५ वर्षीय होमेन्द्रनाथ कवँर रहेका छन्। उनीहरूले घरभित्र रहेका दराज र बाकस फोडेर दुई तोलाको सिक्री, तीन तोलाको बाला, एक तोलाको कुण्डल, एक तोलाको जन्तर, एक तोलाको औँठी र दुई तोलाको ब्रासलेटसहितका सुनका गहना चोरी गरेका थिए।
यसका साथै घरमा रहेका टिभी, क्यामेरा, दुर्बिन र तामाको कलश समेत चोरी भएको प्रहरीले जनाएको छ। घटना लगत्तै अनुसन्धानमा जुटेको जिल्ला प्रहरी कार्यालय नवलपरासीको टोलीले उनीहरूलाई चोरी भएका सामानसहित नियन्त्रणमा लिएको हो। पक्राउ परेका दुवै जनामाथि हिरासतमा राखेर थप अनुसन्धान अघि बढाइएको प्रहरीले जनाएको छ।
