देवदह । देवदह-११, कदमीपुरमा दुर्गा ज्योति महिला समूहको आयोजनामा एक दिने नेतृत्व विकास सम्बन्धी अभिमुखीकरण तथा महिला हिंसा विरुद्ध सचेतना कार्यक्रम सम्पन्न भएको छ । टेवा अनुदान नेपालको सहकार्यमा आयोजित यस कार्यक्रमको मुख्य उद्देश्य पिछडिएका महिलाहरूलाई आफूमाथि हुने अन्याय विरुद्ध लड्न सक्ने बनाउनु र कानुनी उपचारका बारेमा जानकारी गराउनु थियो ।
कार्यक्रममा महिलाहरूको सहभागी थिए । प्रशिक्षण शम्भु हरिजनले दिनुभएको थियो। उहाँले महिला हिंसाका विभिन्न स्वरूप, यसका कारणहरू, र यसबाट बच्ने तथा न्यायिक उपचार प्राप्त गर्ने उपायहरूका बारेमा विस्तृत जानकारी गराउनुभएको थियो। सहभागीहरूले कार्यक्रम अत्यन्त फलदायी रहेको र आफूहरूलाई सशक्त महसुस भएको बताएका छन् ।
कार्यक्रमको सञ्चालन दुर्गा ज्योति महिला समूहकी सचिव दीपा चौधरीले गर्नुभएको थियो। देवदह-११ का वडा अध्यक्ष दुधनाथ यादवको प्रमुख आतिथ्यतामा सम्पन्न भएको यस कार्यक्रमले स्थानीय महिलाहरूमा चेतना अभिवृद्धि गर्न महत्वपूर्ण भूमिका खेलेको छ । कार्यक्रमको मुख्य लक्ष्य महिलाहरूलाई आफ्ना अधिकारबारे सचेत गराउँदै आत्मनिर्भर र सक्षम बनाउनु रहेको आयोजकले जनाएको छ । भविष्यमा पनि यस्ता सचेतनामूलक कार्यक्रमहरू आयोजना गरिने प्रतिबद्धता समूहले व्यक्त गरेको छ ।
