काठमाडौं । बंगालको खाडीमा विकसित ‘अर्नब’ चक्रवात शक्तिशाली बन्दै गएपछि यसको प्रभावले नेपालका विभिन्न क्षेत्रमा वर्षा र हिमपातको सम्भावना बढेको छ। मौसम विज्ञान विभागले विशेष बुलेटिन जारी गर्दै सतर्कता अपनाउन आग्रह गरेको छ।आज (कात्तिक १२ गते) देखि सुरु हुने यस प्रणालीको प्रभावले कोशी, मधेश, बागमती, गण्डकी र लुम्बिनी प्रदेशका धेरै स्थानमा वर्षा हुनेछ।
त्यस्तै, कात्तिक १३ र १४ गते देशका केही स्थानमा मेघगर्जन र चट्याङसहित मध्यमदेखि भारी वर्षा तथा लुम्बिनी प्रदेशका केही स्थानमा भारी वर्षाको सम्भावना छ। कर्णाली र सुदूरपश्चिम प्रदेशका केही क्षेत्रमा समेत वर्षा र हिमपात हुन सक्ने विभागले जनाएको छ। उच्च पहाडी तथा हिमाली क्षेत्रमा जनजीवन प्रभावित हुन सक्ने भन्दै ती जिल्लाहरूलाई उच्च जोखिम (रातो संकेत) मा राखिएको छ।
