रामेछाप । लिखु तामाकोशी गाउँपालिका–१ दुरागाउँले स्थानीय महिलाहरूलाई स्थानीय उत्पादनमा आधारित उद्यममा जोड्न गाउँमा नै उत्पादन हुने कोदोको कुकिज बनाउने तालिम दिन सुरु गरेको छ ।स्थानीय उत्पादनसँग जोडेर आर्थिक विकासको लागि महिलाहरूमा रोजगारी सृजना गर्न तालिम सञ्चालन गरिएको वडाध्यक्ष प्रदीप तामाङले जानकारी दिए । तालिममा स्थानीय १५ जना भन्दा बढी महिलाहरूको सहभागिता रहेको छ ।
पहिलो चरणमा बिस्कुट बनाउने तालिम दिइने बताउँदै तामाङले महिलाहरूले व्यावसायिक रूपमा काम सुरु गरेपछि थप आइटम बनाउने तालिम पनि दिने बताए । ‘पहिला यसमा राम्रो जान्ने हुन्, त्यसपछि यसका थप भेराइटीहरु पाउरोटी लगायतका परिकार बनाउने तालिम पनि दिने योजनामा छौं,’उनले भने ।
कोदोको पिठोबाट यस्ता सामाग्री बन्ने रहेछ भन्ने कुरा आफूहरूले थाहा पाएको बताउँदै सहभागी महिलाहरू तालिम सिकेर बिस्कुट कारखाना खोल्ने योजना सुनाउँछन् । आफूहरूले उत्पादन गरेका स्थानीय पौष्टिक बिस्कुट गाउँपालिकाका विद्यार्थीहरूलाई खाजाको रूपमा पुर्याउने योजना उनीहरूको छ ।
महिलाहरूले तालिम सिकेपछि उद्योग सञ्चालनको लागि आवश्यक उपकरण, फर्निचरलगायत सक्दो सहयोग गर्ने वडाध्यक्ष तामाङले बताए । स्थानीय उत्पादनसँग जोडिएका उद्योग प्रवर्धन गर्न सक्दो सहयोग गर्ने उनले बताए ।
दुरागाउँ र आसपासको क्षेत्र राम्रो कोदो उत्पादन हुने क्षेत्र हो । त्यहाँ उत्पादन भएको कोदामा आधारित भएर उद्योग सञ्चालन गर्ने हो भने स्थानीय उत्पादनले राम्रो मूल्य पाउनुको साथै उद्यमी महिलाहरूले पनि राम्रो आमदानी गर्न सक्ने तामाङको भनाइ छ ।
