भैरहवा । राष्ट्रिय स्वतन्त्र पार्टी (रास्वपा) की सांसद पूनम कुमारी अग्रवालले संसदमा भइरहेका पछिल्ला गतिविधिप्रति कडा असन्तुष्टि जनाउनुभएको छ । सामाजिक सञ्जाल फेसबुकमा लेख्दै उहाँले जनताले सांसदहरूलाई समस्याको समाधान खोज्न, नीति बनाउन र देशको पक्षमा आवाज उठाउन पठाएको स्मरण गराउनुभएको छ । संसद्मा कुर्सी घेराउ गर्ने, आसनमाथि धावा बोल्ने र संस्थालाई बन्धक बनाउने काम जनप्रतिनिधिको नभएको उहाँको तर्क छ ।
लोकतन्त्रमा प्रतिपक्ष आवश्यक भए पनि त्यो जिम्मेवार हुनुपर्नेमा उहाँले जोड दिनुभएको छ । संसद्को मर्यादा कुल्चने, सभामुखलाई निशाना बनाउने र संस्थामाथि अविश्वास सिर्जना गर्ने कार्यले विपक्षीलाई बलियो नभई झन् कमजोर बनाउने भन्दै उहाँले संसद्मा घटेका घटनाहरूले जनताको मुद्दाभन्दा सस्तो लोकप्रियता र राजनीतिक नाटकलाई मात्र बढावा दिएको आरोप लगाउनुभएको छ ।
