पाल्पा । जिल्लाको रैनादेवी छहरा गाउँपालिकामा प्रहरी सेवा, सुविधा र कार्यसम्पादनका विषयमा नागरिक सुनुवाई कार्यक्रम सम्पन्न भएको छ । रैनादेवी छहरा गाउँपालिका, जिल्ला प्रशासन कार्यालय पाल्पा र जिल्ला प्रहरी कार्यालय पाल्पाको संयुक्त सहकार्यमा उक्त कार्यक्रम आयोजना गरिएको हो ।
रैनादेवी छहरा गाउँपालिका वडा नम्बर ४ छहरास्थित गाउँपालिका कार्यालयको सभाहलमा आयोजना गरिएको यस कार्यक्रममा विशेषगरी प्रहरी कार्यालयबाट प्रवाह हुने सेवा सुविधाहरू र प्रहरीका गतिविधिहरूका बारेमा छलफल भएको थियो । कार्यक्रममा जिल्ला प्रहरी कार्यालय पाल्पाका प्रमुख प्रहरी उपरीक्षक दिपेन्द्र पंजियार थारुले नागरिकका गुनासा तथा सुझावहरू सुन्नुका साथै प्रहरी सेवालाई थप उत्तरदायी र प्रभावकारी बनाउने विषयमा अन्तरक्रिया गर्नुभएको थियो ।
कार्यक्रममा रैनादेवी छहरा गाउँपालिकाका अध्यक्ष रुक्माङ्गत भट्टराई, पाल्पाका प्रमुख जिल्ला अधिकारी बिनु कुवर बज्राचार्य र सहायक प्रमुख जिल्ला अधिकारी ऋषिराम सुवेदीको उपस्थिति रहेको थियो । यसैगरी, उक्त नागरिक सुनुवाई कार्यक्रममा गाउँपालिकाका विभिन्न वडाका वडा अध्यक्षहरू, वडा सदस्यहरू, स्थानीय समाजसेवी, बुद्धिजीवी वर्ग तथा स्थानीय सर्वसाधारणको सहभागिता रहेको थियो । स्थानीय स्तरमा शान्ति सुरक्षा कायम गर्न, नागरिकका समस्या प्रत्यक्ष रूपमा सुन्न र प्रहरी–नागरिक सम्बन्धलाई थप प्रगाढ बनाउन यस कार्यक्रमले महत्त्वपूर्ण भूमिका खेलेको बताइएको छ ।
