भैरहवा । नेकपा (एमाले) ले आगामी फागुन २१ गते हुने प्रतिनिधि सभा सदस्य निर्वाचनका लागि नेता बासुदेव घिमिरेलाई रुपन्देही क्षेत्र नम्बर ३ बाट उम्मेदवार बनाउने निर्णय गरेको छ । २०७९ सालको निर्वाचनमा रुपन्देही–५ बाट निर्वाचित हुनुभएका घिमिरेले यसपटक क्षेत्र परिवर्तन गर्दै रुपन्देही–३ बाट प्रतिस्पर्धा गर्न लाग्नुभएको हो ।
तिलोत्तमा नगरपालिकाका पूर्व नगरप्रमुख समेत रहनुभएका घिमिरे हालै सम्पन्न एमालेको ११ औं महाधिवेशनमा केन्द्रीय सदस्य पदमा पराजित हुनुभएको थियो । केही साताअघि मात्र पार्टी परित्यागको घोषणा गरेर पुनः एमालेमै फर्किएका घिमिरेलाई पार्टीले यसपटक महत्त्वपूर्ण जिम्मेवारी दिएको छ । २०७९ को निर्वाचनमा यस क्षेत्रमा एमालेको समर्थनमा राष्ट्रिय प्रजातन्त्र पार्टीका दीपक बोहराले तत्कालीन गृहमन्त्री एवं कांग्रेस नेता बालकृष्ण खाणलाई पराजित गरी जित हासिल गर्नुभएको थियो ।
