भैरहवा । सिद्धार्थ उद्योग वाणिज्य संघ, रुपन्देहीले आयोजना गरेको अन्तरक्रिया कार्यक्रममा उद्योगी व्यवसायीहरुले भैरहवा भन्सारमा भोग्नुपरेका अनेकौं समस्याबारे गुनासो गरेका छन् । भन्सार सहजीकरणका लागि आयोजित कार्यक्रममा व्यवसायीले उठाएका जायज माग सम्बोधन गर्ने प्रमुख भन्सार अधिकृतले प्रतिबद्धता जनाएका छन् ।
कार्यक्रममा उद्योगी व्यवसायीहरुले भन्सारमा सर्भर डाउन हुने, कर्मचारीबाट हुने ढिलासुस्ती, पार्किङमा हुने विलम्ब, बैंकिङ प्रणालीको झन्झट तथा भन्सार कार्यालय र अन्नपूर्ण टर्मिनलबीच समन्वयको अभाव जस्ता समस्याले वस्तुको उत्पादन लागत बढेको र आर्थिक नोक्सानी व्यहोर्नुपरेको बताए ।
संघका अध्यक्ष नेत्रप्रसाद आचार्यले नेपालको प्रमुख भन्सार नाका भएकाले यसलाई व्यवस्थित बनाउन सबै पक्षले भूमिका खेल्नुपर्नेमा जोड दिए । भन्सार एजेन्ट संघका अध्यक्ष मधुप्रसाद पन्थीले अन्य नाकामा नभएको ओभरलोडको नियम यहाँ लगाएर व्यवसायीलाई अन्यत्र धपाउन खोजिएको आरोप लगाए । त्यस्तै, पर्यटन व्यवसायी कैलाश गुप्ताले पुरानो प्रविधिका कारण भारतीय पर्यटकले सीमामा अनावश्यक दुःख पाएको गुनासो गरे ।
कार्यक्रममा उठेका गुनासाको जवाफ दिँदै प्रमुख भन्सार अधिकृत रामप्रसाद रेग्मीले व्यवसायीका जायज मागलाई तत्काल समाधान गर्न प्रयास गर्ने बताए । उनले भन्सारको ‘आशिकुडा सफ्टवेयर’मा देखिने समस्या प्राविधिक भएको र यसलाई क्रमशः सुधार गर्दै लैजाने प्रतिबद्धता व्यक्त गरे ।
