काठमाडौं । कम्युनिष्ट नेता गोविन्दराज ज्ञवालीलाई अभिनन्दन गरिएको छ । बर्दियाको मधुस्थली प्रतिष्ठान मधुवनले शुक्रबार प्रज्ञा प्रतिष्ठानमा समारोह आयोजना गर्दै एमाले नेता ज्ञवालीलाई अभिनन्दन गरेको हो ।
ज्ञवाली २०४८ सालको निर्वाचनमा बर्दिया क्षेत्र नं ३ बाट प्रतिनिधि सभा सदस्यमा निर्वाचित भएका थिए । उनी साहित्यकर्मी पनि हुन् । समारोहमा पूर्वराष्ट्रपति विद्यादेवी भण्डारी र एमाले सांसद प्रदीप ज्ञवाली लगायतको उपस्थिति थियो ।
अभिनन्दन समारोहमा बोल्दै पूर्वराष्ट्रपति विद्यादेवी भण्डारीले नेता ज्ञवालीले राष्ट्रिय मुद्दाहरु सबैलाई एकै ठाउँमा उभ्याउन गरेको भूमिका अविस्मरणीय रहेको बताइन ।
राष्ट्रिय मुद्दा र मुलुकलाई समस्या परेको बेला कम्युनिष्ट विचार र दर्शन बोकेका पार्टीहरुलाई मात्र नभई गैर कम्युनिष्टहरुलाई समेत एक ढिक्का भएर लागेको भन्दै ज्ञवालीको प्रशंसा गरिन् ।
उनले भनिन्, ‘राष्ट्रिय मुद्दाहरुमा सबैलाई कसरी एक ठाउँमा ल्याउन सकिन्छ भनेर उहाँले साहित्य र राजनीतिको माध्यमबाट खेलेको भूमिका अविस्मरणीय छ । एक त वैचारिक हिसाबले आफू कम्युनिष्ट विचारक भएका कारण, कम्युनिष्ट विचार र दर्शन भएका पार्टी र नेताहरुलाई एक ठाउँमा ल्याउनुभयो । देशलाई अप्ठ्यारो भएको बेला गैर कम्युनिष्टहरुलाई समेत एक ढिक्का भएर अगाडि बढ्न प्रेरित गर्नुभयो । आज यहाँ उभिएर उहाँलाई अभिनन्दन गर्न पाउँदा एकदम खुसी लागेको छ ।’
त्यस्तै पूर्वराष्ट्रपति भण्डारीले अग्रज र नयाँ पुस्ताबीच दुरी बढ्दै गइरहेको भन्दै अग्रज पुस्तालाई सम्मान गर्ने संस्कारको संरक्षण गर्नुपर्ने बताइन् ।
‘अग्रज पुस्तलाई सम्मान गर्ने संस्कारको संरक्षण पनि गर्नुपर्दछ । अहिलेको अवस्थामा इतिहासको जानकारी र त्यसको निरन्तरता नलिँदाखेरि हाम्रो नवपुस्ता र अग्रज पुस्ताहरुबीच दुरी बढेको जस्तो देखिन्छ । हामीले प्रज्ञा प्रतिष्ठान लगायतका भवनहरुको पुरा सदुपयोग गरेर अग्रजपुस्ता र अहिलेको नयाँ पुस्ता बीचको दुरी घटाउनु पर्दछ,’ उनको भनाइ थियो ।
