भैरहवा । रुपन्देही प्रहरीले भन्सार छली गरि भारतबाट नेपाल ल्याईएको ठूलो परिमाणको कपडा बरामद गरेको छ । जिल्ला प्रहरी कार्यालय रुपन्देहीका प्रवक्ता लक्ष्मी खनालले दिएको जानकारी अनुसार बरामद कपडाको मूल्य ५० लाख बढी रहेको छ ।
खनालका अनुसार इलाका प्रहरी कार्यालय बुटवल, इलाका प्रहरी कार्यालय रन्यौरा र प्रहरी चौकी बेलभरिया रुपन्देहीबाट खटिएको संयुक्त प्रहरी टोलीले आईतबार उक्त कपडा बरामद गरेको हो । बुटवल उप–महानगरपालिका वडा नम्बर १५ मा लु १ ख ८३४० नम्बरको ट्रकलाई शंका लागी रोकी चेकजाच गर्ने क्रममा भन्सार छली अबैध रुपमा ल्याउदै गरेको अवस्थामा कपडा बरामद भएको उनले जानकारी दिइन ।
कपडाको मूल्य ५० लाख ४२ हजार ४ सय ५० र ट्रकको अन्दाजी १२ लाख गरी जम्मा अन्दाजी मुल्य ६२ लाख ४२ हजार ४ सय ५० रुपैया रहेको खनालले बताइन । बरामद भएको कपडाहरुमा लेडिज उलन सुट २ हजार ८ सय ५७ वटा, ६ सय ९० रोल उलन सुटको रोल कपडा, ९ सय ६० वटा अमूल सेण्डो, २ सय ४० वटा जेन्स सर्ट, २ सय ३० वटा जेन्स कुर्ता लगायतका समान रहेको छ ।
बरामद भएको कपडा र ट्रक आवश्यक कार्यवाहीको लागि भैरहवा भन्सार कार्यालय पठाईएको र यस विषयमा थप अनुसन्धान भई रहेको प्रहरी प्रवक्ता लक्ष्मी खनालले बताइन ।
